第一次去西班牙，在馬德里渡過了幾天，已感到西班牙令人著迷之處，這次修甲就充分表現出西班牙人可愛的地方，值得紀錄一下。
話說我第一日到時去藥房想睇睇護膚品，有個sales走埋黎用西班牙文同我解釋，我就當然唔明啦！於是我就問佢可唔可以講英文...之後佢露出一個充滿自信的笑容話...
"No, haha" 再繼續不斷地講西班牙文！
原本認為外國人必須講自己d話果d人就係精神失常，所以我並唔認為唔講英文係個問題，但個sales以自信的態度繼續用西班牙文滔滔不絕，確實令人震驚呀！一般咁既情況，通常sales會有點唔好意思 / 搵同事幫手 / 唔sell就算，呢種大而化之的態度真係好可愛！
而慢慢我發現多數西班牙人都係咁，語言障礙並唔會打擊佢想同你講野的慾望，搞搞下我仲學到d 西語單字......
講番修甲，平時我一般自己修，但今次我唔記得帶工具，再買過比較貴，見有國際知名的OPI nail salon，價錢同香港有點規模的店不相伯仲，所以book左星期日6點。
形容下間鋪，係開放式nail bar咁，係一間百貨的地庫超市隔離，所以都幾多人經過。
到當日我懷住極唔好意思的心情去修甲，因為我忘記左歐洲人無咁奴性，大多數地方星期日基本上唔開工 / 極早收工，我book人地星期日6點實在係阻人收工唔醒目之極！去到果然見全店已得番一個不懂英語的肥妹坐陣，而肥妹心情亦明顯麻麻，都係我既錯......
修甲過程全世界都差不多，無咩好提，肥妹因為趕收工以光速完成工序，效果竟然還真不錯，厲害厲害
修甲是快速的，漫長的是等待甲乾的時間。OPI這類高端一點的甲油因為減少了傷甲的成份，一般都需要1個鐘左右才完全乾透，去美甲店會叫你等半個鐘左右，甲面基本乾透了才讓你回去。
因為等甲乾時手只能放著，咩都唔做得，無聊的時光中，肥妹首先向我推薦了2支含真18k 及 24k 金的甲油，我並沒什麼興趣，後來她索性拿出一本女性網購雜誌和我傾下網購，興致勃勃地教我點上網 / 郵寄買野（記住佢係講西班牙文的...）
講講下佢打開雜誌賣假陽具同震旦果頁，指黎指去，大意係話我知「你睇！呢d都有得賣！仲好多款呀喂！呢個勁呀！」
講完性玩具，佢就開始講性感內衣，邊件平過商場，有咩豐胸提pat功能，佢想買邊件著比男友睇，都講得一清二楚......
點解我唔識西班牙文都明？因為佢邊講邊企起到係咁做身體語言！！星期日下午的超市很多人買送趕住番屋企，再加埋耐不時有人中入黎問佢仲開唔開工，但佢就係咁旁若無人地用身體語言描述性玩具同性感內衣！！
雖然我唔係咩純情玉女，但呢刻都感到無比老尷......但我又明白佢唔想我悶先係咁講野，有點感動
半個鐘過去，我懷住震驚又溫暖的心回到酒店。
沒有留言:
張貼留言